اسلام آباد۔26جولائی (اے پی پی) وزیر مملکت انفارمیشن ٹیکنالوجی و ٹیلی کمیونیکیشن شزہ فاطمہ خواجہ اتے پاکستان مسلم لیگ (ن) دی ٻیاں تریمت ارکان اسمبلی عظمیٰ بخاری دے خلاف ڈیپ فیک ویڈیو دے ذریعے کوڑے پروپیگنڈے دی مذمت کریندے آکھیے ایندے ذمے واراں تے ایں نقلی ویڈیو کوں شیئر کرݨ آلیں کوں قانونی کارروائی دے ذریعے نشان عبرت بݨایا ویسی ھک مخصوص سیاسی جماعت کوڑا پروپیگنڈہ کرتے مخالفین اتے تریمتاں کوں سوشل میڈیا تے نشانہ بݨیندی پئی اے، ہݨ ایویں نہ تھیسی ۔ اے ڳالھ وزیر مملکت انفارمیشن ٹیکنالوجی و ٹیلی کمیونیکیشن شزہ فاطمہ خواجہ وزیراعظم دی رابطہ کار موسمیاتی تبدیلی رومینہ خورشید عالم، ارکان قومی اسمبلی شائستہ پرویز ملک، نوشین افتخار، زیب جعفر اتے وجیہہ قمر دے رلے جمعہ کوں پریس کانفرنس توں خطاب اچ آکھی ۔ شزہ فاطمہ آکھیے عظمیٰ بخاری دی ایڈیٹ کیتی ڳئی ویڈیو کوں سوشل میڈیا تے وائرل کیتا ڳئے ، کہیں ٻئے دی تصویر لاتی ڳئی ، عظمیٰ بخاری سیاست اچ اپݨا مقام بݨا چکئن ، او بہادر بݨ تے حکومت تے آپݨی سیاسی جماعت دا موقف پیش کریندن ، ایں ویڈیو دا مقصد انھاں دی زبان بندی کراوݨ اے۔ انہاں آکھیے سوشل میڈیا پلیٹ فارم تے انہاں دی نقلی ویڈیو دے حوالے نال درخواست کیتی جیں تے میٹا وختی کارروائی کیتی تے ویڈیو ڈیلیٹ کرݙتی ایں ویڈیو کوں پوسٹ اتے بغیر تصدیق دے ری پوسٹ کرݨ آلیں دے خلاف کاروائی کریسوں ، انہاں دی عالمی سطح تے تضحیک کیتی ڳئی ، ذمہ واراں کوں عبرت دا نشان بݨیسوں کوئی رعایت نہ ݙیسوں ۔ انہاں آکھیے ھک سیاسی جماعت دی قیادت دی طرفوں تریمتاں دے خلاف بیان بازی کیتی ویندی اے جیں توں معاشرہ تباہ تھی ویندے، عظمیٰ بخاری دی ڈیپ فیک ویڈیو بݨائی ڳئی، اساں اصل ویڈیو کڈھی ۔ انہاں آکھیے ایف آئی اے اچ وی درخوست جمع کرواݙتی اے وختی کارروائی تھیسی، ذمہ واراں کوں بے نقاب کرتے سزا ݙیوا تے رہسوں، عظمیٰ بخاری انھاں دے کوڑ کوں نشابر کریندن ایں سانڳے انہاں دی کردار کشی کیتی ڳئی ۔ انہاں آکھیے اے ریاست مدینہ دی ڳالھ کریندن جیں اچ تریمتاں تے مرد دے مساوی حقوق ہن، اے اسلام دا غلط استعمال کرتے تریمتاں دی تضحیک کریندن ، انھاں دے قائدین اتے کارکناں دی تربیت ہی ایجھی اے جیں پاروں نینگر نسل تباہ تھیندی پئی اے، سابق وزیراعظم دی بیان بازی سماجی اقدار کوں تباہ کیتا، چھوٹے وݙے دی تمیز مک ڳئی اے ، تریمتاں دے خلاف آئے ݙینھ پروپیگنڈہ کیتا ویندے ، حکومت فیک نیوز اتے فیک ویڈیو کھنڈاوݨ آلیں دے خلاف سخت کاروائی کریسی ساݙی سیاسی تربیت انھاں وانڳوں کائنی ، کوڑا پروپیگنڈہ انھاں دی تربیت دا حصہ اے، اساکوں اپݨے حقوق دے نال مذہبی، سیاسی اتے معاشرتی ذمہ واریاں دا احساس کرݨا چاہیدے، اپݨی نینگر نسل دی بہترین تربیت کرݨی چاہیدی اے انہاں آکھیے سائبر کرائم تکھے نبیڑݨ سانڳے اتھارٹی بݨائی ویندی پئی اے ۔ وزیراعظم دی رابطہ کار موسمیاتی تبدیلی رومینہ خورشید عالم آکھیے سیاست اتے صحافت توں تعلق رکھݨ آلیاں ساریاں تریمتاں دی دی عزت و احترام کرݨا چاہیدے،تریمتاں دی تذلیل سانڳے ہر قسم دے ہتھکنڈے استعمال کرݨ آلیں کوں نشان عبرت بݨایا ویسی تریمتاں تے فقرے کسݨ آلیں کوں پتہ لڳݨا چاہیدے ہݨ ایویں نہ تھیسی ، ملک دا آئین و قانون تریمتاں کوں تحفظ ݙیندے ۔ رکن قومی اسمبلی شائستہ پرویز ملک آکھیے اے قابل مذمت واقعہ اے، پورے ملک دیاں تریمتاں عظمیٰ بخاری دے رلے کھڑن ۔وجیہہ قمر آکھیے مخصوص سیاسی جماعت ڈیجیٹل پلیٹ فارم تے آپݨے خلاف آواز چاوݨ آلیاں تریمتاں کوں نشانہ بݨیندی اے ، پارٹی چھوڑݨ تے میکوں وی نشانہ بݨایا ڳیا ، مذکورہ جماعت فوجی تنصیبات تے حملے کیتے انہاں دا رویہ کہیں صورت وی قابل معافی کائنی
