وانا۔20جنوری (اے پی پی):وزیر اعظم عمران خان جنوبی وزیرستان اچ تھری جی اتے فور جی انٹرنیٹ سروس کھولݨ دا اعلان کریندے ہوئیں آکھیے جو دہشت گردی قبائلی ضلعے ساریں توں ودھ متاثر تھئن ، نینگراں کوں روزگار ݙیوݨ اولین ترجیح اے ، قبائلی ضلعیں اچ سکول ، ٹیکنیکل کالج اتے یونیورسٹیاں بݨیسوں ، جنوبی وزیرستان دے عوام کیتے تعلیم اتے روزگار وݙے چیلنج ہن ،عوام کوں علاج دی سہولت ݙیوݨ کیتے ہیلتھ کارڈ ݙیسوں ، قبائلی علاقیں اچ زیتون دی کاشت دا انقلاب گھن آندے پیوں ، احساس پروگرام دے تحت غریب اتے مستحق لوکاں کوں مالی معاونت ݙتی ویسی ، بھارتی حکومت پاکستان اچ مسلسل انتشار کھنڈیندی پئی اے ،پی ٹی آئی حکومت دا فلسفہ اے جو پسے ہوئے طبقے اتے پسماندہ علاقیں کوں ترقی ݙتی ویسی ، ویلھا ثابت کریسی جو قبائلی علاقیں دے انضمام دا فیصلہ بہترین فیصلہ ہئی ۔ اے ڳالھ وزیر اعظم عمران خان بدھ کوں اتھاں کامیاب جوان پروگرام دے تحت چیک تقسیم کرݨ دی تقریب توں خطاب کریندے ہوئیں آکھی اے ۔ وزیراعظم عمر ان خان آکھیے جو جیڑھے علاقے ترقی اچ پھچوں رہ ڳئن اساݙی کوشش اے جو اتھاں دے لوکاں کوں وی سہولتاں ݙتیاں ونڄن تے انہاں علاقیں کوں وی ترقی ݙتی ونڄے ۔ میں اتھاں ووٹ گھنݨ کائنی آیا تے نہ ہی انتخابی مہم اچ جیڑھے وعدے کیتے ویندن اوجھے وعدے کرݨ آیاں اساݙی پوری کوشش اے جو پسماندہ علاقیں دی ترقی ، تعلیم اتے ٻیاں سہولتاں ݙیوݨ کیتے سارے اقدامات کیتے ونڄن ۔ اتھاں سکول، کالج ، تکنیکی ادارے اتے یونیورسٹیاں قائم کریسوں۔ اقتدار اچ آوݨ توں پہلے اساں نمل یونیورسٹی قائم کیتی ایں وانڳوں یونیورسٹیاں بݨاوݨ چاہندوں کیوں جو اساݙی ساریں توں وݙی طاقت اساݙے نینگرہن
