xcاسلام آباد۔6جون(اے پی پی)وفاقی وزیر داخلہ شیخ رشید احمد آکھیے جو حکومت کوں کوئی خطرہ کائنی، عمران خان مقدر دا سکندر اتے ٻہوں خوش قسمت اے جیکوں نااہل، نالائق، نکمی، نکٹھو اتے بے کار اپوزیشن ملی اے، شہباز شریف تاریخ ڳزرݨ دے باوجود حالی تئیں ای سی ایل اچوں ناں کݙھݨ کیتے کوئی درخواست نئیں ݙتی۔ اے ڳالھ انہاں اسلام آباد اچ میڈیا نال الیندے آکھی۔ انہاں آکھیا جو کرونا ویکیس نیشن مہم کامیاب رہی اے اتے قوم وی ایس او پیز تے عمل کر ݙکھائے جیندے نال روز بہتری آندی پئی اے۔ انہاں کرونا نال نبڑݨ کیتے محکمہ صحت اتے طبی عملہ دے جذبیاں دی تعریف کیتی۔ انہاں آکھیا جو پاکستان اچ کرونا ویکسی نیشن بارے پروپیگنڈہ دے باوجود لوکاں ذمہ داری ݙکھائی اے، ویکیسی نیشن دا رحجان ودھیے، تہون اڄ پاکستان اچ کرونا دی صورتحال ٻہوں بہتر اے، سائنو فارم ٻہوں زبردست ویکسین اے، فائزر تے تحفظات بارے وزیر اعظم آپ متعلقہ ملکاں نال رابطے اچ ہین۔ انہاں آکھیا جو اپوزیشن ہر سازش اچ ناکام تھی ڳئی اے، جیڑھے روز حکومت کوں کݙھݨ دے جوڑ ٻدھیندے ہن اڄ آپ مائنس تھی ڳین، دسمبر وی ڳئے اتے مارچ وی بھل حکومت تریڄھے ہک ٻئے مالی سال دا بجت پیش کرݨ آلی اے، امید اے جو سرکاری ملازمین کوں وݙا ریلیف ملسی۔ شیخ رشید آکھیا جو نواز شریف بیماری دا چکر ݙے تے نکل ڳین بھل شہبازشریف کوں ٻاھرو نہ ونڄݨ ݙیسوں، حکومت کون کوئی خطرہ کائنی، شرطیہ آہداں جو بجت اچ جہانگیر ترین دے سارے ووٹ وی حکومت کوں پوسن۔
