نوشہرہ۔21اپریل (اے پی پی) وزیراعظم عمران خان آکھیا جو کمزور اتے طاقتور سانڳے قانون ہکو سواں ہووݨا چاہیدے، طاقتور لوک چاہندن جو او چوری کرن، ڈاکے مارن اتے منی لانڈرنگ کرن ولا وی کوئی نہ پکڑے انہاں کوں، سارے شعبیاں اچ مافیاز بیٹھن۔ شوگر مافیا مہانگی کھنڈ وچیندے اتے ٹیکس نی ݙیندا، کمزور اتے طاقتور سانڳے قانون ہک ہووݨا چاہیدے۔ اڄوکی حکومت سستے گھراں دا خواب حقیقت تئیں پجائے،جیڑھا معاشرہ کمزور اتے غریب طبقے دا خیال نی رکھیندا او ترقی نی کر سڳدا۔ پناہ گاہواں دا سلسلہ پورے ملک اچ کھنڈیسوں۔ انہاں اے ڳالھیں بدھ کوں اتھاں نیا پاکستان ہائوسنگ سکیم منصوبے دے تحت جلوزئی ہائوسنگ سکیم دا منڈھ بدھݨ دی تقریب نال خطاب کریندیں ہوئیں آکھی۔ وزیراعظم آکھیا جو اے ہائوسنگ سکیم ایں طبقے سانڳے اے جیڑھے جو آپݨا گھر نی بݨا سڳدے۔ انہاں آکھیا جو مدینہ دی ریاست اچ حضور اکرمﷺ جیڑھا انقلاب گھن آئے ہن اوندا بنیادی فلسفہ ایہو ہئی جو معاشرے اچ کمزور طبقے،غریباں ، یتیماں اتے بیواواں سانڳے معاشرے اچ احساس پیدا کیتا ڳئے اتے اے پہلے کڈاہیں وی ایجھا کائنی تھیا۔ تقریب نال وزیراعلی خیبر پختونخوا محمود خان وی خطاب کیتا۔ جلوزئی ہائوسنگ سکیم دے تحت 40 ہزار روپے توں گھٹ آمدݨٰی آلے لوکاں سانڳے 18 مہینے دی گھٹ مدت اچ 1320 اپارٹمنٹس بݨائے ویسن۔
