اسلام آباد۔13جون(اے پی پی):وفاقی وزیر آبی وسائل سید خورشید احمد شاہ آکھیے مہمند، داسو اتے بھاشا ڈیماں دی تعمیر قومی ترجیح بݨایا ونڄے تاں اسااں کنے آپݨی اتنی دولت آویسی جو کہیں ݙوجھے پاسے ݙیکھݨ دی لوڑھ کائنی ، اساکوں آپݨے وسائل کوں استعمال کرݨا ہوسی ، زراعت تے توجہ ݙتی ونڄے تاں اتھاں کوئی بھکا نہ مرسی ، سرکاری ملازمین دیاں تنخواہیں اچ ودھارا ٻہوں چنڳاں اقدام اے ، غریب دی غربت مکاوݨ نال ہی معیشت بہتر تھیسی ، دعا ہے جو ملک اچ وختی انتخابات تھیون ، اتھاں حقیقی جمہوریت ہوسی تاں ملک کوں کوئی خطرہ نہ رہسی ۔ قومی اسمبلی اچ بجٹ 24 ۔ 2023 تے بحث اچ حصہ گھندے ہوئیں وفاقی وزیر آبی وسائل سید خورشید احمد شاہ آکھیے غیر یقینی سیاسی صورتحال، روپے دے مقابلے اچ ڈالر دی قدر اچ ودھارا ، معیشت دی زبوں حالی اتے آئی ایم ایف دی شرطاں کوں ݙٹھا ونڄے تاں انہاں حالات اچ بجٹ پیش کرݨ ٻہوں اوکھا کم اے ۔ وݙے ݙکھ دی ڳالھ اے جو ایں ایوان دے ارکان اتے وزرا دی اکثریت اتھاں موجود کائنی، لوکاں دی اساں توں توقعات ہن ، ایں ایوان دے ذریعے عوام دی بجٹ اچ شمولیت ٻہوں ضروری اے ، انہاں حالات اچ اساکوں عوام دا دل رکھݨا چاہیدے، جمہوریت کیتے پیپلزپارٹی آپݨی جاناں دے نذرانے پیش کیتے، جیلاں کٹیاں ، کوڑے کھادے۔ انہاں آکھیے پارلیمنٹ کوں بے توقیر نی تھیوݨا چاہیدا اساں چاہندوں فیصلے ایوان اچ کیتے ونڄن ۔
